〈掠無聲的埕過〉 鄭順聰

 〈掠無聲的埕過〉

鄭順聰

仝款是無風無搖的日子

一个人來到曠闊的埕

共放送頭攑起來

欲共話講誠實

風共伊的聲挾去

鐵線迵過嚨喉

空茫予一切全聽袂著

人影就墜落時間的空縫

做一个影，濟濟的影

iánn iánn ê iánn

互相才聽會著

踮烏暗

oo oo oo的oo

才聽會著

規大陣規大陣的心聲

一个一个的頷頸束死去

酸酸臭臭的烏吐袂出來

電火布共埕封貼甲密密

袂予任何的穎發出來

便若用筆寫落來的字

擽擽做蟲仔

墜落烏汁汁的深淵

椅仔排規排做大四正

100粒心 × 頭殼100

萬萬空位同齊合唱

聽攏無聲

彼都無算聲、無算言語

無算真理、全全予禁止

干焦死是安全的

欲講啥就講啥

siánn siánn siánn ê siánn

大埕是上保險的

連甲一塊影都無

猶原是無風無搖的日子

大陣大陣的人𤲍入大埕

聲音放予響

共影挵予破

毋願做別人的影

毋願被禁止無聲

大大聲講出心聲

一埕播一埕、心聲結心聲

予濟濟濟閣較濟的埕

全世界的人攏聽著咱的聲

是真理，就毋驚予禁止

是心聲，該自由無比止

──看《走揣湯德章》和《陳文成的練習題》有感

【簡介】台語

鄭順聰，作家，嘉義民雄人，中山大學中文系，台師大國文研究所畢業。

台語作品有詩集《我就欲來去》，小說《大士爺厚火氣》，散文《台語好日子》、《台語心花開》，繪本《仙化伯的烏金人生》。